عييييييييييييييييييييييييييييييييييييييييييييييييييييييييييب

شنية؟

 شفما؟

 شبينا ولينا هكا ؟؟؟

 فيبالكم الي "الثورة" تعدى عليها 14 شهر ؟

 فيبالكم الي البطالة كثرت على قبل؟

 فيبالكم الي الجهات الداخلية زادت تهميش ؟ فيبالكم الي المعيشة ولات غالية برشة ؟

 فيبالكم الي الزوالي ماعادش خالط على شيء ؟ فيبالكم الي الشعب كلو زوالي ؟

 تعرفوه الزوالي ؟ نسيتوهم الزواولة ؟

 نسيتو الشهداء ؟

 نسيتو حق الشهداء ؟

 نسيتو الجرحى ؟

 فيبالكم الي الجرحى لتوا يعانيو ؟

 فيبالكم الي فما جريح ثورة مات خاطر ما لقاش عناية ؟

 فيبالكم الي قتلوا الشهداء لتوا مسيبين ؟

 ويني المحاسبة ؟

 فيبالكم الي بن علي مازال مسيب ؟

 و الطرابلسية كيف كيف ؟

 فيبالكم الي فلوسنا مازالت لبرّه ؟

 فيبالكم الي حدنا على مطالب الثورة ؟

 فيبالكم الي التشغيل و الكرامة و الحرية و العدالة الاجتماعية و الديمقراطية هي اهداف الثورة ؟

 ولا عندنا اهداف اخرى ؟

 باش تفيقوا ولّا ؟

 فيبالكم خرينا فيه بالنوم؟

 فيبالكم و فيبالكم و فيبالكم ؟

 خلاصة القول فيقوا على ارواحكم راو

عييييييييييييييييييييييييييييييييييييييييييييييييييييييييييب

نحكيو شويا بالسياسة

ايا قلنا السلام .. اليوم حبيت نحكي شوية في كل شيء و نبدا من حادثة صارتلي و أنا ننشر في المقال الأخير متاع تجريم التطبيع إذا بيه فما مشرفة على واحدة من الصفحات الكبيرة بدون ذكر الأسماء قالتلي إنت ما عندكش دراية بالقانون الدستوري و تجريم التطبيع داخل في العلاقات الخارجية و ما يمكنش تضمينو في الدستور ..  

الحاصل بهّمت وقتها و توة باش نجاوبها .. 

نذكرك أنو الدستور العراقي و الدستور السوري تضمنوا يوما ما بند يجرم التطبيع ثم إذا كنت إنت مؤمنة بأنو التطبيع جريمة علاش ما يتمّش التنصيص عليها في الدستور أما إذا كنت ماكش مؤمنة بيها وقتها نقلك شوف حلول لعمرك .. أنتقل مباشرة للإنتخابات متاع المجالس العلمية و التضارب في الأقوال في ما يخص النتائج ..

قبل كل شيء فرحت برشا وقت الي تقريبا ما سجلت حتى حالة عنف و الإنتخابات صارت بكل شفافية و حميمية .. 

ثانيا النتائج و لما تقارنها بانتخابات المجلس التاسيسي تلاحظ انو فما فرق هذاكا علاش أنا اعتبر أنو الإتحاد العام لطلبة تونس خرج رابح في المعركة .. 

هذا رايي طبعا لكن فما حاجة خطيرة نحب ننبهلها هي صعود بعض التجمعيين ..

 على كل أمرّ إلى المسيرة متاع نصرة الشريعة الي طرحت إشكالية خطيرة و الي هي أحنا كتوانسة شنوا نحبوا بالظّبط ديمقراطية و لا 

خلافة الحاصل لك الله يا تونس 

مازلت عندي ما نحكي اما صباعي وجعوني و باش نخرج نعمل سيقارو ..

قبل ما نخرج نفكركم الي نهار 30 مارس موعدكم لنصرة القضية الفلسطينية من امام المجلس التاسيسي بآآآآاي ننشر

التطبيع خيانة و ليست وجهة نظر

بسم الله الرحمان الرحيم 
كما يعلم الجميع فالتونسيون و إن اختلفوا فكريا أو إيديولوجيا أو عقائديا فإننا نتفق على جملة من المبادئ العامة في مجتمعنا لعل من أهمها حسب رأيي طبعا المتعلق منها بدعم القضية الفلسطينية و رفض التطبيع مع العدو الصهيوني رفضا قاطعا باعتبار هذا الكيان عدوا للأمة جمعاء .. نخلص هنا الى القول بأن تضمين تجريم التطبيع في دستور الجمهورية التونسية إذا تم لن يكون دخيلا أو مسقطا على هذا المجتمع .. لكننا نلحظ مع ذلك أن بعض الأطراف السياسية ترفض مجرد الحديث في هذا الأمر .. ربما لمجرد اعتبارات سياسية و ديبلوماسية و جيواستراتيجية و نقصد بهذه الأطراف السياسية الأحزاب الحاكمة و تتعلل بأنه يجب أن نكون دولة حياد مع هذه القضية في حين أن الحياد لم يعتمد في تعاملنا مع القضية السوية .. لن أرد على هؤلاء بل سأوجه الدعوة الى كل أحرار البلاد الرافضين للتطبيع إلى المشاركة في التحرك الذي سيتم تنظيمه من أمام المجلس التأسيسي و ذلك في إطار حملة كاملة و برنامج عمل للوصول الى تضمين دستور البلاد بندا يجرم التطبيع .. الدعوة موجهة للجميع يوم 30 مارس الموافق ليوم الأرض الفلسطيني ..
 و شكرا